Bakı–Sumqayıt yolundakı tıxac həlli yolu təklif olunub. Sumqayıt24 bu haqda 12 iyun tarixində Yenisabah.az-a istinadən xəbər verir.
Sumqayıt əhali sayına görə ölkənin ən böyük ikinci şəhəridir. Burada təxminən 426 min nəfər yaşasa da, yetərincə iş yerləri yoxdur. Sumqayıtlıların böyük qismi iş üçün Bakıya üz tutur. Nəticədə səhər və axşam saatlarında tıxaclar yaranır.
İqtisadçı Natiq Cəfərli bəzi müəssisə və dövlət qurumlarının Sumqayıta köçürülməsi təklifindən danışıb:
“Özəl sektora deyə bilmərik ki, fəaliyyətini Bakıdan Sumqayıta köçürsün. İş yerləri Bakıda daha sərfəlidir deyə, əsasən, paytaxtda açılır. Ona görə də bu özəl sektora aid bir məsələ deyil. Amma bəzi dövlət və hökumət orqanlarının Sumqayıta, Gəncəyə və ya ölkənin müxtəlif yerlərinə köçürülməsi mümkündür”.
Ekspert bu fikrinə aydınlıq gətirib:
“Açığı, bu, bir az çətin məsələdir. Əslində Bakının yükünün azaldılması təkcə Sumqayıtla bağlı məsələ deyil. Sumqayıtdan Bakıya işləməyə gələnləri araşdırmaq lazımdır. Bu istiqamətdə yaxşı sorğu keçirilməlidir ki, Sumqayıtdan Bakıya işləməyə gələn vətəndaşlar daha çox hansı sahələrdə çalışırlar. Əgər, məsələn hansısa dövlət və hökumət qurumlarında daha çox çalışan varsa, onların nümayəndəliklərini və ya baş idarələrini Sumqayıta köçürmək mümkündür”.
