Sumqayıtın müəssisə, idarə əməkdaşları və iş adamları Çinə səfər ediblər. Sumqayıt24 bu haqda 28 may tarixində xəbər verir.
İcra Hakimiyyətinin şöbə müdiri Gündüz Əliyevin rəhbərlik etdiyi nüməyəndə heyəti Çunçin şəhərində “Beynəlxalq Dostluq Şəhərləri Əməkdaşlığı” konfransına qatılıb. Onlarla yanaşı, burada dünyanın 26 ölkəsindən 40 şəhərin nümayəndə heyətləri iştirak edib.
Konfrans çərçivəsində “Biomüxtəlifliyin Qorunması üzrə Beynəlxalq Dostluq Şəhərləri Əməkdaşlığı” təşəbbüsü irəli sürülüb. Tərəfdaşlığın dərinləşməsinə dair konsensusa nail olunub. Həmçinin bir çox istehsalat müəssisələrinə və sərgilərə baxış keçirilib, iş adamları qarşılıqlı əməkdaşlıq üçün danışıqlar aparıblar.
Sumqayıt ictimaiyyəti adından ağac əkilib və Çunçinin mərkəzi küçələrinin birində şəhərimizin şəkilləri sərgilənib. Tədbirdə Sumqayıtda yaradılan müasir sənaye klasterləri, xüsusilə Kimya Sənaye Parkı haqqında danışılıb.
