Fövqəladə Hallar Nazirliyi Sumqayıt Regional Mərkəzinin binasında tədbir keçirilib. Sumqayıt24 bu haqda 29 mart tarixində xəbər verir.
Nüvə və Radioloji Fəaliyyətin Tənzimlənməsi üzrə Dövlət Agentliyinin təşkil etdiyi maarifləndirici görüş nüvə və radiasiya təhlükəsizliyi sahəsində olub. Burada tibb müəssisələrinin radioloji fəaliyyətlə məşğul olan əməkdaşları iştirak ediblər.
Onlarla nüvə və radioloji fəaliyyət sahəsində nəzarət funksiyalarının həyata keçirilməsi üzrə mövcud qanunvericilik tələblərinin icmalı, tibb müəssisələrində ionlaşdırıcı şüalanma mənbələrinin tətbiqi ilə bağlı radiasiya təhlükəsizliyinin təmini, nüvə və radiasiya təhlükəsizliyinin qiymətləndirilməsi, bu sahədə hüquq pozuntuları və hüquqi məsuliyyət məsələləri müzakirə olunub.
Tədbir zamanı Atom Enerjisi üzrə Beynəlxalq Agentliyin təlim kurslarına qatılmış ekspertlər – Agentliyin Nüvə və radioloji təhlükəsizliyin ekspert qiymətləndirilməsi və maarifləndirmə şöbəsinin müdiri Mətanət Qəhrəmanova, Xüsusi icazə və Dövlət Reyestri şöbəsinin müdiri Ramin Paşayev, Nüvə və radioloji fəaliyyətə nəzarət şöbəsinin müdiri İlham Sadıqov və Hüquq şöbəsinin müdiri Aysel Həsənova təqdimatla çıxış ediblər.
Sonda videoçarxlar nümayiş olunub, suallar ətraflı cavablandırılıb.
