Dövlət Təhlükəsizliyi Xidməti (DTX) tərəfindən saxlanılan transmilli mütəşəkkil kibercinayətkar dəstə üzvü məhkəmə qarşısına çıxarılacaq. Bu haqda 13 mart tarixində Sumqayıt24 Report.az-a istinadən xəbər verir.
Bir qrup xarici ölkə vətəndaşı Azərbaycanda bankların kompüter sistemlərinə müdaxilə edərək, şifrələr və digər açar funksiyalar barədə məlumatları ələ keçiriblər.
Dəstə üzvləri Bakı və Sumqayıt ərazisində quraşdırılmış bankomatlara yaxınlaşıb heç bir kart daxil etmədən və fiziki müdaxilə etmədən internet vasitəsilə kənardan verdikləri komanda nəticəsində qurğuların təqdim etdiyi pul vəsaitlərini götürərək ölkəni tərk ediblər.
Azərbaycana ekstradisiya edilmiş dəstə üzvü İon Sekrieru Aleksandroviçin barəsində cinayət işi üzrə istintaq yekunlaşıb. İş baxılması üçün Sumqayıt Ağır Cinayətlər Məhkəməsinə göndərilib.
Dəstənin digər üzvləri – Danila Dorin Konstantinoviç və Qubçak Sergey Aksentiyeviç DTX tərəfindən Cinayət Məcəlləsinin “Kompüter sisteminə və ya kompüter məlumatlarına qanunsuz müdaxilə etməklə talama” maddələri ilə ittiham olunublar. Onlar məhkəmə tərəfindən ağır cəzalara məhkum ediliblər.
