Məşhur həkim Sumqayıtı seçib. Sumqayıt24 bu haqda 15 aprel tarixində Sumqayıt Tibb Mərkəzinə (STM) istinadən xəbər verir.
İnvaziv uşaq kardioloqu, tibb üzrə fəlsəfə doktoru Elnur İmanov Uşaq Xəstəxanasında fəaliyyətə başlayıb. O, dünyada proktor həkim statusunu qazanan 12 nəfərdən biridir.
E. İmanov 1974-cü ildə Bakı şəhərində anadan olub. 1992-2001-ci illərdə Türkiyənin İstanbul Universitetinin “Cerrahpaşa Tıp Fakültesin”də təhsil alıb.
2004-2006-cı illərdə Azərbaycan Tibb Universitetinin Uşaq xəstəlikləri kafedrasında aspiranturaya qəbul olub, eyni zamanda həmin illərdə İstanbul Universitesi “Çapa Tıp Fakültesi”ndə Uşaq xəstəlikləri kafedrasında oxuyub.
2006-2009-cu illərdə İstanbul şəhərində “Dr. Siyami Ersek Kalp Damar Cerrahisi” xəstəxanasında uşaq kardioloqu təhsili alıb. İxtisaslaşmasını ABŞ-nin Çikaqo şəhərində yerləşən “Rush” universitetində davam etdirib.
2009-2011-ci illərdə Mərkəzi Klinikada uşaq kardioloqu işləyib. 2011-2019-cu illərdə Akademik M.A.Topçubaşov adına Elmi-Cərrahiyyə Mərkəzində böyük elmi işçi kimi fəaliyyət göstərib.
2019-cu ildən etibarən Azərbaycan Tibb Universitetinin Tədris-Terapevtik Klinikasında II Uşaq xəstəlikləri kafedrasında həkim-uşaq kardioloqu, həmçinin müəllim vəzifəsində çalışır.
İmanov ABŞ-də fəaliyyət göstərən Pediatrik və Konjenital Kardiologiya Assosiasiyasının, Avropa Kardiologiya Cəmiyyətinin müəllim heyət üzvü, Türkiyə Pediatrik Kardiologiya Cəmiyyətinin və Azərbaycan Kardiologiya Cəmiyyətinin üzvüdür.
64 elmi işi xarici (Türkiyə, ABŞ) və ölkə mətbuatında çap olunub.
Çoxsaylı elmi konqreslərdə iştirak edib və müxtəlif sayda elmi məqalələrin müəllifidir.
O, proktor həkim statusunu dünya miqyaslı “ABBOT” təhsil şəbəkəsində qazanıb. Bu şəbəkənin sertifikatı azərbaycanlı həkimin bütün dünya üzrə təlimçi statusunu təsdiqləyir.
Elnur İmanov Asiya, Yaxın Şərq, Qafqaz və Şimali Afrika ölkələri üzrə təlimçidir.
