Sumqayıt şəhərində Sosial Sahibkarlıq və Məşğulluq Mərkəzi açılıb. Sumqayıt24 bu haqda 9 mart tarixində xəbər verir.
Burada həssas sosial qruplara aid şəxslərə ilkin mərhələdə dərzi peşəsi üzrə biliklər öyrədiləcək, eyni zamanda tekstil məhsulları istehsal olunacaq. Əmək bazarının tələblərinə uyğun tədris olunacaq peşələrin sayı artırılacaq.
Mərkəz KOBİA, Dövlət Məşğulluq Agentliyi, Azərbaycan Həmkarlar İttifaqları Konfederasiyası, Dayanıqlı Operativ Sosial Təminat Agentliyi, “Azərsu” ASC, “Azərmaş” ASC, Bakı Mühəndislik Universiteti, “Ekvita”, Bakı Tekstil Fabriki və “Əlil Sahibkarlar Təşkilatı” İctimai Birliyinin dəstəyi ilə yaradılıb.
Müəssisədə peşə biliklərinə yiyələnən şəxslərə mikrobiznesə başlamaq üçün təlim, məsləhət və mentor dəstəyi də göstəriləcək. Təlimlərini başa vuracaq şəxslər avadanlıqlarla təmin edilmələri üçün aidiyyəti qurumlarla əlaqələndiriləcəklər.
Həmçinin layihənin tərəfdaşları iştirakçılara biznes-planın hazırlanması, sahibkarlıq fəaliyyətinin idarə olunması və inkişafı sahəsində məsləhət xidmətləri göstərəcək. Peşə təlimlərini uğurla başa vuran şəxslərin mərkəzdə işləmək imkanı da olacaq.
