Sumqayıt Şəhər Dövlət Yanğından Mühafizə İdarəsinin 21 nömrəli Yanğından mühafizə hissəsinin rəis köməkçisinə hökm oxunub. Sumqayıt24 bu haqda 13 iyun tarixində Oxu.az-a istinadən xəbər verir.
Nahid Həsənov (soyad şərti) sözügedən vəzifədə iki il işləyib. O, bu dövrdə etibardan sui-istifadə etmə və aldatma yolu ilə xeyli miqdarda özgə əmlakını ələ keçirib.
Nahidə Cinayət Məcəlləsinin 178.2.2, 178.2.3, 29,178.2.2, 29,178.2.3 və 29,178.2.4-cü maddələri ilə ittiham irəli sürülüb.
Məlumata görə, o, Fuad Bayramovu və Rasif Ağasızadəni 4000 manata Fövqəladə Hallar Nazirliyində yanğınsöndürən vəzifəsinə düzəldəcəyini vəd edib. N. Həsənov həmin şəxslərə bildirib ki, 5 avqust 2023-cü ildə hər ikisi FHN-in hospitalında həkim komissiyasından keçəcək. Avqustun 10-na qədər isə əmrləri veriləcək. Nahid bu yolla onlardan pulları alaraq mənimsəyib.
Bundan başqa, o, Siyəzən rayon sakini Asif Paşayevə yalandan FHN-in Sumqayıt Regional İdarəsində yanğınsöndürən vəzifəsinə qəbul etdirəcəyi vədini verib, onun yaxınından 4000 min manat alıb.
Kişi eyni üsulla bir neçə şəxsdən də 6000 və 4270 manat pul alıb.
Məhkəmənin qərarı ilə Nahidə 2 il 5 ay 22 gün müddətinə azadlığın məhdudlaşdırılması cəzası təyin edilib.
