Sumqayıtdan olan kişi qəhrəmanlıq göstərib. Sumqayıt24 bu haqda 29 mart tarixində Oxu.az-a istinadən xəbər verir.
Bir neçə gün öncə Moskva vilayətindəki “Crocus City Hall” konsert kompleksində terror aktı baş verib. Sumqayıt şəhərində doğulub boya-başa çatan 30 yaşlı Kamil Nəsibov 100-dən çox insanı xilas edib.
O, binadakı “Şokoladnitsa” kafesində işləyib. Terror baş verən gün növbəsi saat 19:55-də başa çatıb.
“Çölə çıxdıq və güllə səsləri eşitdik. Əvvəlcə qorxsaq da, sonra qayıtmaq qərarına gəldik”, - deyə Kamil bildirib.
Həmşəhərlimiz güllə yarası almış bir neçə nəfəri yolun kənarına çıxarıb, yoldan keçən maşınlara mindirib, konsertə gecikənlərin hamısını uzaqlaşdırıb. Sonra binaya girib, qapıları sındırıb və insanlara çıxmaları üçün yol göstərib. Hər yeri qatı tüstü bürüyəndə isə aşağı mərtəbədəki dəhlizdə 80-ə yaxın adama çıxmağa kömək edib.
Kamil insanları axtararkən yerdə fənəri yanan smartfona rast gəlib və yolu işıqlandırmaq üçün onu götürüb:
“Telefon zəng çaldı: Kamilla adı yazılmışdı. Telefonu açdım və bir qızın qışqıraraq yardım istədiyini eşitdim. O, dəhşət içində idi, dedi ki, ətrafdakı hər şey yanır və özü də ikinci mərtəbədəki bir yerə yıxılıb”.
Nəsibov ikinci mərtəbədə Kamillanın axtarışlarına başlayıb:
“Üçüncü mərtəbə çökmüşdü. Yanğın çıxışları açılanda orada çoxlu cəsəd gördüm. Mən səndələyirdim, nəfəs ala bilmirdim”.
O, xüsusi təyinatlı əsgəri görüb və hər şeyi danışıb. Hərbçi onun vəziyyətini görüb, binadan çıxarıb. Sonra isə qızın tapıldığını bildirib. Kamil daha sonra xilasedicilər vasitəsilə Kamillaya telefonunu qaytarıb.
Qeyd edək ki, Kamil üç il əvvəl işləmək üçün Moskvaya yollanıb.
