Sumqayıt Regional Perinatal Mərkəzinin fəaliyyət göstəriciləri açıqlanıb. Sumqayıt24 bu haqda 8 iyun tarixində xəbər verir.
Sumqayıt Tibb Mərkəzinin direktor müavini, Mərkəzin rəhbəri Təranə Rəcəbli jurnalistlərə bildirib ki, tibb ocağı regional olaraq 3-cü səviyyəli doğuşayardım xidməti göstərir. Mərkəzdə neonatal reanimasiya və intensiv terapiya, neonatal cərrahi laporoskopik ginekoloji əməliyyatlar həyata keçirilir.
Qeyd olunub ki, burada fasiləsiz rejimdə 4-cü səviyyəli laborator və təcili tibbi yardım xidməti göstərilir:
"Mərkəzimizdə prenatal və neonatal skrininq edilir. Katamnestik izləm kabinetimizdə xəstə və vaxtından əvvəl doğulmuş uşaqların sağlamlığı nəzarətdə saxlanılır. 2024-cü ilin yanvar-may aylarında 1641 katamnestik gəliş olub. Region üzrə yenidoğulmuşların ROP müayinəsini edirik. Bu rəqəm isə 257-dir".
T. Rəcəbli göstərilən xidmətlərlə bağlı bəzi göstəriciləri də diqqətə çatdırıb:
"Perinatal Mərkəzdə bu ilin ilk 5 ayı ərzində 610 doğuş qeydə alınıb. 2023-cü ilin sentyabrından bu günədək 22 neonatal cərrahi əməliyyat həyata keçirilib. Bu ilin ilk 5 ayında mərkəzimizə 64 hamilə təxliyə edilib. Bununla yanaşı, 611 audiometriya icra edilib, 799 topuq testi götürülüb".
Direktor müavini əlavə edib ki, qadınların reproduktiv orqanlarının xərçəngönü xəstəliklərini aşkarlamaq məqsədilə kolposkopik müayinə ilə yanaşı, “PAP smear” testləri də edilir:
"Bu ilin ilk 5 ayında 198 kolposkopik müayinə həyata keçirilib. İcbari tibbi sığortanın uğurlu tətbiqi, sağlamlıq sahəsində sosial bərabərliyi və iqtisadi dayanıqlığı təmin etmək baxımından mühüm əhəmiyyət daşıyır".
