Qurban bayramı İslamın müqəddəs bayramlarından biri sayılır. Bayram hicri-qəməri təqviminin 12-ci ayı olan Zilhiccə ayının 10-cu günü, Məkkədə həcc dövründə qurbanlıq heyvanların kəsilməsi şəklində qeyd olunur və adətən, üç gün davam edir.
Qurban bayramı İbrahim Peyğəmbərin həyatında baş verən əhvalatdan sonra yaranıb. Yuxuda Allah İbrahim Peyğəmbərə oğlu İsmayılı qurban verməyi əmr edir. Bu, İbrahim Peyğəmbərin Allaha imanını yoxlamaq üçün edilmişdir. İbrahim Peyğəmbər Allahın əmrini yerinə yetirməyə hazır idi. Lakin sonra bunun bir sınaq olduğu məlum olur və İbrahim Peyğəmbərdən qurban olaraq bir qoç kəsməsi tələb olunur.
Qurban bayramında məscidlərdə xüsusi bayram namazı qılınır, dəvə, mal-qara, davar qurban kəsilir, evlərdə və qəbiristanlıqlarda dua oxunur, ehsan verilir.
Sovet hakimiyyəti dövründə bu bayram ölkə səviyyəsində deyil, sadəcə bir sıra insanlar tərəfindən qeyd olunurdu. Milli Məclisin qəbul etdiyi 1992-ci il 27 oktyabr tarixli “Azərbaycan Respublikasının bayramları haqqında” Qanununa əsasən, hazırda Qurban bayramı dövlət səviyyəsində qeyd olunur.
