Saray qəsəbəsində, 3 nömrəli məktəbdə “Yaşıl dünya naminə həmrəy olaq" adlı tədbir baş tutub. Bu haqda 13 mart tarixində Sumqayıt24 Abşeron–Xızı Regional Təhsil İdarəsinə istinadən məlumat verir.
Tədbirdə Regional Təhsil İdarəsinin müdiri İlhamə Abdullayeva, Abşeron rayonunun icra başçısının müavini Gülnar Rəhimova və məktəbin pedaqoji kollektivi iştirak ediblər.
İştirakçılar əvvəlcə məktəbin foyesində şagirdlərin əl işlərindən ibarət sərgi ilə yaxından tanış olublar. Şagirdlərin mövzu əsasında hazırladıqları layihələr dinlənilib, layihələrin il ərzində məktəblərdə keçirilməsinə dair müvafiq tövsiyələr verilib.
Daha sonra məktəblilərin hazırladıqları qısametrajlı film nümayiş olunub. Səhnəciklər və musiqi nömrələri təqdim edilib.
Sonda şagirdlər və müəllimlərə tədbir iştirakçıları tərəfindən fəxri fərmanlar təqdim edilib.
