Sumqayıtda paranoid şizofreniya xəstəsinin pensiyası kəsilib. Sumqayıt24 bu haqda 1 iyun tarixində BakuTV-yə istinadən xəbər verir.
Zeynəb Qulamovanın sözlərinə görə, qızı Könül Şeydayeva 2015-ci ildə qeysəriyyə yolu ilə uşaq dünyaya gətirib. Əməliyyat zamanı onun sinirlərinə zərər verilib və qadın xəstəliyə düçar olub:
"İki azyaşlı oğlu var. Onlara baxa bilmir. İl boyu xəstəxanalarda müalicə alır, amma heç bir xeyri yoxdur. Qızıma görə evimi də satmışam".
Z. Qulamova qızının pensiyasının 2023-cü ilin sentyabr ayından kəsildiyini qeyd edib:
"Həmin ilin dekabr ayında müraciətimizə yenidən imtina cavabı gəldi. Qızımı ağır vəziyyətdə Əmək və Əhalinin Sosial Müdafiəsi Nazirliyinə apardım. Dedilər: “Narahat olmayın, qızınızın pensiyası bərpa olunacaq".
Xəstənin anası bildirib ki, məsələ ilə bağlı Səhiyyə Nazirliyinə müraciət etsə də, həlli üçün heç bir tədbir görülməyib.
Dövlət tibbi-sosial ekspertiza və reabilitasiya agentliyinin sözçüsü Tural Qurbanov məsələyə belə aydınlıq gətirdi:
“Sumqayıt şəhər sakini Şeydayeva Könül Elman qızının əlilliyi həm elektron sistem üzərindən həm də dövlət tibbi-sosial ekspertiza və reabilitasiya agentliyinin həkim ekspertləri tərəfindən əyani baxış zamanı qiymətləndirilib. Müayinə zamanı vətəndaşın hazırkı sağlamlıq vəziyyətində əlillik təyinatına əsas verən əlamətlər müşahidə edilməyib.
Bu səbəbdən də Nazirlər Kabinetinin 13 may 2022-ci il tarixli 187 nömrəli qərarında təsdiq edilmiş əlilliyinin müəyyən olunması meyarlarına uyğun olaraq, diaqnozun əlillik əlaməti təyin etməməsi barədə qərar verilib”.
