“STP Metal Structures” şirkətində qoşqu və yarımqoşqular hazırlanır. Bu haqda 17 aprel tarixində Sumqayıt24 STP-yə istinadən məlumat verir.
STP Şirkətlər Qrupuna daxil müəssisədə tikinti, sənaye, habelə kənd təsərrüfatı obyektlərinə müxtəlif təyinatlı yüklərin daşınması zamanı istifadə olunan qoşqu və yarımqoşqular hazırlanır.
Bunlardan biri 3 oxlu “STP AYDY-60” markalı, 60 ton yükdaşıma qabiliyyətinə malik ağır yükdaşıyan yarımqoşqulardır.
Şirkət ümumilikdə il ərzində 100-ə yaxın bu tipli yarımqoşquların və onların dartıcılarının komplektləşdirilməsini təmin etmək gücünə malikdir. Sözügedən yarımqoşqunun öz çəkisi 15 ton, uzunluğu 15 metr, eni 3.5 metr, yükləmə hündürlüyü isə 1.3 metrdir.
Qeyd edək ki, Vətən müharibəsindən sonra Bakıda və Xankəndidə təşkil olunan qələbə paradlarında hərbi texnikanın daşınması və nümayişi zamanı sözügedən yarımqoşqulardan istifadə olunub.
