Sumqayıt Dövlət Dram Teatrının 55 illik yubileyi münasibətilə tədbir keçirilib. Bu haqda 15 mart tarixində Sumqayıt24 xəbər verir.
Tədbirdə şəhər İcra Hakimiyyəti aparatı, müəssisə və təşkilat rəhbərləri iştirak ediblər.
Moderatorlar – gənc aktyorlar Elay Xasıyev və Aynur Hümmətova teatrın şərəfli yaradıcılıq yoluna tarixi ekskurs ediblər. Teatrın yubileyi həm də doğma şəhərin 75 illiyinə təsadüf etdiyindən burada "Sevgilim Sumqayıt" psixoloji dramı təqdim olunub.
Daha sonra şəhər rəhbəri Zakir Fərəcov ölkədə mədəniyyətə verilən dövlət dəstəyindən danışıb. Dram Teatrının 55 illik yubileyi, həm də Sumqayıtın 75 illiyi ilə əlaqədar aktyorlar Habil Xanlarov, Rövşən Əsgərov, Siyavuş Mahmudov, Ceyhun Məhərrəmov və Yalçın Səlimov fəxri fərmanlarla təltif ediliblər.
Habelə şəhərin ictimai, sosial, mədəni həyatına töhfə vermiş Əvəz Mahmud, Sovet Şükürov və Təbrik Quliyevə “Heydər Əliyevin 100 illiyi” medalı teqdim olunub.
YAP şəhər təşkilatının sədri Ramiz Hüseynov icra başçısının layiq görüldüyü “Heydər Əliyevin 100 illiyi” medalını ona təqdim edib.
Sonda icra başçısı hər kəsi qarşıdan gələn Novruz bayramı münasibətilə təbrik edib.
