Sumqayıtda “Kəskin daşlı xolesistitin müalicəsində müasir yanaşmalar” mövzusunda konsensus konfransı keçirilib. Sumqayıt24 bu haqda 4 mart tarixində xəbər verir.
Tədbir Azərbaycan Minimal İnvaziv Cərrahlar Cəmiyyəti, Almazakademi Tibbi Treninq Mərkəzi, TƏBİB və Sumqayıt Tibb Mərkəzi tərəfindən Heydər Əliyev Mərkəzində təşkil olunub. Müxtəlif ixtisaslı həkimlərin qatıldığı konfransın açılışında İcra başçısı Zakir Fərəcov, Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili, Səhiyyə komitəsi sədrinin müavini Rəşad Mahmudov, deputat Müşfiq Məmmədli çıxış ediblər.
TƏBİB-nin icraçı direktorunun müavini Araz Nəsirov bildirib ki, əhalinin sağlamlığının qorunması, tibbi xidmətlərin keyfiyyətinin daha da yaxşılaşdırılması daim diqqət mərkəzindədir.
Sumqayıt Tibb Mərkəzinin direktoru Elnur Azadxanov rəhbərlik etdiyi müəssisənin fəaliyyətindən, həyata keçirilən cərrahi əməliyyatlardan danışıb.
Konfransın panel hissəsi M.A. Topçubaşov adına Elmi Cərrahiyyə Mərkəzinin Yoğun və düz bağırsağın cərrahlığı şöbəsinin rəhbəri, tibb elmləri doktoru, Azərbaycan Minimal İnvaziv Cərrahlar Cəmiyyətinin prezidenti, professor Qurbanxan Müslümov tərəfindən 1 nömrəli Xəstəxanada icra olunan cərrahiyyə əməliyyatının canlı translyasiyası ilə başlayıb.
Plenar iclasla professorlar Qurbanxan Müslümov, Rəşad Mahmudov, İslam Mahalov, tibb üzrə fəlsəfə doktorları Emil Muxtarov, Fərid Rəfiyev, Nicat Alışov və Cavanşir Vahabov tərəfindən təqdimatlar edilib, iştirakçılarla bərabər müzakirələr təşkil olunub.
Sonda iştirakçıları maraqlandıran suallar cavablandırılıb.
