Sumqayıtda 8 Mart – Beynəlxalq Qadınlar Günü münasibətilə bayram tədbiri keçirilib. Bu haqda martın 8-də Sumqayıt24 Sumqayitxeber.com-a istinadən xəbər verir.
Şənlikdə icra başçısı Zakir Fərəcov, hüquq-mühafizə orqanlarının, idarə, müəssisə və təşkilatların rəhbərləri, şəhid anaları və qazilər, şəhərdə müxtəlif sahələrdə çalışan qadınlar iştirak ediblər.
Əvvəlcə şəhidlərimizin əziz xatirəsi bir dəqiqəlik sükutla yad edilib. Dövlət Himni səsləndirilib.
Çıxış edənlər bayram münasibətilə qadınları təbrik ediblər, onlara xoş arzularını çatdırıblar. Qeyd olunub ki, Sumqayıtın sosial-iqtisadi inkişafında və ictimai həyatında şəhər qadınlarının xidmətləri çox böyükdür. Sonra şəhər rəhbəri bir qrup qadına fəxri fərmanlar təqdim edib.
Rəsmi hissədən sonra tanınmış müğənnilərin iştirakı ilə konsert proqramı təqdim edilib.
