Abşeron–Xızı Regional Təhsil İdarəsinin (AXRTİ) tabeliyindəki ümumi təhsil müəssisələrinin rəhbərləri ilə görüş keçirilib. Sumqayıt24 bu haqda 25 aprel tarixində xəbər verir.
Tədbir Sumqayıt şəhər 9 nömrəli məktəbində baş tutub. Burada Təhsil İdarəsinin rəhbərliyi və ümumtəhsil məktəblərinin direktorları iştirak ediblər. Müzakirə mövzuları cari tədris ili ərzində görülmüş işlər, gələcəkdə icrası nəzərdə tutulan məsələlər, xüsusilə 2024-2025-ci tədris ili üzrə birinci siniflərin qəbulu, 4 və 6-cı siniflərdə monitorinqlərin təşkili, eləcə də yeni işə qəbul mexanizmləri olub.
Məktəb idarəetməsində səmərəliliyin artırılması, müəllim-şagird, müəllim-valideyn münasibətlərinin düzgün tənzimlənməsi mövzularında müzakirələr aparılıb. İmtahanların təşkili qaydaları, həmçinin tədris ilinin yekununa dair görüləcək işlər barədə məktəb rəhbərlərinə müvafiq tapşırıq və tövsiyələr verilib.
Daha sonra ümumi və məktəbəqədər təhsil müəssisələrinin rəhbərləri ilə bu və digər məsələlər ətrafında müzakirələr aparılıb, onları maraqlandıran suallar cavablandırılıb.
