Sumqayıtda "Məişət zorakılığının uşaqlara təsiri və zorakılığın acı nəticələri" mövzusunda tədbir keçirilib. Sumqayıt24 bu haqda 29 iyun tarixində Sumqayıt Tibb Mərkəzinə (STM) istinadən xəbər verir.
Görüş 7 nömrəli Ailə Sağlamlıq Mərkəzi (ASM) tərəfindən dislokasiya ərazisində yaşayan bir qrup Hacı Zeynalabdin Tağıyev qəsəbə sakini üçün təşkil olunub. ASM-in baş həkimi Vüsalə Cavadzadə bu tip maarifləndirmələrin əhəmiyyətindən danışıb.
Ailə həkimi-pediatr Səadət Soltanova “Ailədaxili zorakılığın uşaqların sağlamlığına mənfi təsirləri” mövzusundan söz açıb. Buna qarşı mübarizə tədbirlərinin vacibliyi vurğulanıb.
Vəkillər Kollegiyasının üzvü vəkil Rəşad İldırımzadə isə “Məişət zorakılığının hüquqi aspektləri” mövzusunda çıxış edib. O, məişət zorakılığı və onun növləri, zorakılıq törətmiş şəxslərin qanunvericiliyə uyğun məsuliyyət daşıdıqlarını diqqətə çatdırıb.
Psixoterapevt Dürdanə Məmmədova məişət zorakılığının uşaqların psixikasına mənfi təsirləri və onun reabilitasiyasından danışıb. Bildirilib ki, məişət zorakılığının cəmiyyət üçün ən ağır fəsadlarından biri də psixoloji travma almış uşaqlardır. Reabilitasiya belə uşaqların cəmiyyətdə şəxsiyyət kimi formalaşmasında önəmli rol oynayır.
Sonda iştirakçıların sualları cavablandırılıb. Mövzu ilə bağlı bukletlər paylanılıb.
