Xarabalığa dönən hamamla bağlı açıqlamalar verilib. Sumqayıt24 bu haqda 13 aprel tarixində Oxu.az-a istinadən xəbər verir.
Məlumat verdiyimiz kimi, Corat qəsəbəsində beş yüz illik Hacı Məcid hamamı baxımsız qalıb. Dağılıb-tökülən tarixi abidə zibilxana əvəzi işlədilir.
Mədəni İrsin Qorunması, İnkişafı və Bərpası üzrə Dövlət Xidmətindən bildirilib ki, bu hamam dövlət mühafizəsinə götürülmüş abidələrin siyahısına daxil deyil. Siyahıya daxil edilməsi üçün qeydiyyata alınıb və lazımi tədbirlər görülür. Hamamın ətrafına və içərisinə məişət tullantılarının atılması ilə bağlı dəfələrlə tədbirlər görülsə də, eyni hallar yenidən təkrarlanır. Bir neçə ay öncə də analoji hal baş vermişdi və yerli icra orqanları ilə birgə təmizlik işləri aparılmışdı.
Sumqayıt şəhər İcra Hakimiyyəti hamamın Mədəniyyət Nazirliyinin balansında olduğunu və ərazidə təmizlik işləri aparılacağını qeyd edib.
Mədəniyyət Nazirliyinin mətbuat xidmətindən isə bildirilib ki, tarixi bina birmənalı olaraq qurumun balansında deyil.
“Hacı Məcid yeni aşkar olunmuş abidə kimi qeydiyyata alınıb. Dövlət mühafizəsinə götürülmüş abidələrin siyahısına daxil edildikdən sonra bərpa və istifadəsi məsələsinə baxılacaq”, – deyə nazirlik əlavə edib.
