Xəzər dənizinin səviyyəsinin azalması davam edir. Bu haqda 29 fevral tarixində Sumqayıt24 ARB Xəbər-ə istinadən məlumat verir.
Suyun çəkilməsini əyani şəkildə Sumqayıt bulvarında müşahidə etmək mümkündür. Ərazi quraqlığa çevrilib. Sakinlər deyirlər ki, son 2-3 ildə dənizin suyu əhəmiyyətli dərəcədə geri çəkilib.
Mütəxəssislərin sözlərinə görə, 1995-ci ildən bu günə kimi Xəzərin səviyyəsi təxminən 2,5 metrdən çox azalıb. Suyun çəkilməsinə təsir göstərən səbəblərin müxtəlif olduğu deyilir.
“Ən böyük amillər yağıntıların azalması və antropogen amillərdir. Həmçinin Volqanın, həm də Xəzərə tökülən digər çayların hövzələrində su anbarlarının tikilməsi, suların kənd təsərrüfatı məqsədləri üçün istifadə olunması rol oynayır. Digər səbəb isə qlobal istiləşmədir. Hövzələrdən buxarlanmanın azalması, həm də Xəzər dənizinin səthindən buxarlanmanın artmasına görə suyun səviyyəsi aşağı düşür. Eləcə də küləyin sürəti artıb və istiqaməti dəyişib, bu da bilavasitə buxarlanmanın artmasına və səviyyənin aşağı düşməsinə səbəb olur”, – deyə AMEA-nın Coğrafiya İnstitutunun şöbə müdiri Səid Səfərov bildirib.
Tədqiqatlar Xəzər dənizinin səviyyəsinin 2042-ci ilə qədər azalmağa davam edəcəyini göstərir. Ondan sonra suyun səviyyəsinin tədricən arta biləcəyi proqnozlaşdırılır.
