Sumqayıtda 16 saylı yataqxana qəzalı vəziyyətdədir. Bu haqda 20 aprel tarixində Sumqayıt24 Apa.az-a istinadən məlumat verir.
Şəhərin 42-ci məhəlləsində yerləşən bina uzun müddətdir baxımsız qalıb. 130 ailənin yaşadığı yataqxanada nə sanitar qovşaqlar, nə də mətbəxlər işlək vəziyyətdədir.
“Bina günü-gündən çökür. Divarlar qopub sakinlərin başına tökülür. Üfunətdən binaya girmək mümkün deyil. Təmir üçün pul ayrılsa da, aidiyyəti qurum hələ də bina ilə bağlı heç bir addım atmayıb”, – deyə şikayətçilər bildiriblər.
Məsələ ilə bağlı Sumqayıt şəhər İcra Hakimiyyətinin mətbuat katibi Eyvaz Qocayev məlumat verib ki, şəhərdəki mövcud yataqxanalara yenidən baxış keçirilir. Bundan sonra bir neçə yataqxana, eyni zamanda həmin yataqxana ilə bağlı aidiyyəti quruma yenidən müraciət olunacaq.
