Rəhim Əzimov küçəsində yenidən su problemi yaşanır. Sumqayıt24 bu haqda 23 noyabr tarixində xəbər verir.
Redaksiyamız tərəfindən Saray qəsəbəsində yerləşən həmin küçədə suyun gün ərzində cəmi bir neçə saat gəldiyini işıqlandırmışdıq. Əhalinin sözlərinə görə, bundan sonra problem həllini tapmışdı.
Lakin çox keçmədən məsələ gündəmə qayıdıb. Üstəlik qış aylarının gəlməsi insanların işini lap çətinə salıb:
“Bu küçədə yenə davamlı su gəlmir. Siz paylaşmışdınız, bir ara düzəlmişdi. Sonra yenə belə oldu. Qışdır, istilik sistemini qoşa bilmirik. Çünki qoşulması üçün su lazımdır. Donaq biz?
Səhər oyanırıq ki, su yoxdur, işə gecikirik. “Azərsu”nun operatorları da adamı yola verir, minnətlə danışırlar, elə bil günahkar bizik. Deyirlər: “Sizdə su gəlmirsə, mən nə edə bilərəm?”. Problemimizi aidiyyəti üzrə yönləndirmələrini istəyirik. Cavabında isə nömrə verirlər ki, əlaqə saxlayaq. Əlaqə saxlayırıq, biri deyir ki, qəza var, o biri deyir ki, təzyiq düşüb, digərinin isə heç xəbəri yoxdur”, – deyə şikayətçilər bildirirlər.
Sakinlərin birinə verilən cavab isə onu şoka salıb:
“O gün zəng etmişəm “Azərsu”ya ki, bizdə 3 gündür su gəlmir. Operator isə məndən soruşur: “Sizdə bu gün su günüdür ki?”. Çox təəccübləndim, nə deyəcəyimi bilmədim”.
