H.Z. Tağıyev qəsəbəsi Əliağa Vahid küçəsində kanalizasiya sistemi yoxdur. Burada 400-ə yaxın vətəndaş yaşayır. Sumqayıt24 bu haqda XəzərTV-yə istinadən xəbər verir.
Ərazinin 100 metr yaxınlığında yerləşən Şirvan yaşayış massivində kanalizasiya xətti var, lakin sözügedən küçənin sakinləri ondan istifadə edə bilmir. Onlar öz həyətlərində quyu qazır, yağış yağanda isə ərazini su basır və üfunət qoxusu bürüyür. Məsələnin maraqlı məqamı odur ki, burada kanalizasiya sistemi olmasa da, sakinlərdən illərdir tullantı sularına görə pul yığılır.
Bununla bağlı, Sumqayıt Sukanal İdarəsinin rəisi Xalid Quliyev açıqlama verib. O bildirib ki, məsələ Abonentlərlə İşlər Şöbəsi tərəfindən araşdırılacaq. Belə halla qarşılaşdıqda, içməli su ödənişləri saxlanılacaq, tullantı sularına görə isə gələn ödənişlər dayandırılacaq.
Quliyev onu da qeyd edib ki, Əliağa Vahid küçəsində kanalizasiya xəttinin yaradılması layihəyə salınıb və yaxın gələcəkdə icra olunacaq.
