General-mayor Natiq Sahib oğlu Qarayev Prezident Sərəncamına əsasən medalla təltif edilib.
Sumqayit24.az xəbər verir ki, Azərbaycan Prezidenti İlham Əliyev Səfərbərlik və Hərbi Xidmətə Çağırış üzrə Dövlət Xidmətinin hərbi qulluqçularının və mülki işçilərinin təltif edilməsi haqqında Sərəncam imzalayıb.
Sərəncama əsasən, Səfərbərlik və Hərbi Xidmətə Çağırış üzrə Dövlət Xidmətinin (SHXÇDX) Sumqayıt şəhər baş idarəsinin rəisi Natiq Sahib oğlu Qarayev "Vətən uğrunda" medalı ilə təltif edilib.
Qeyd edək ki, daha əvvəl – 2020-ci il dekabrın 15-də Natiq Qarayev "Azərbaycan Bayrağı" ordeni ilə təltif edilib. O, Azərbaycan Respublikasının ərazi bütövlüyünün bərpa edilməsi zamanı döyüş əməliyyatlarına yüksək peşəkarlıqla rəhbərlik etmiş, düşmənin canlı qüvvəsinin və döyüş texnikasının məhv edilməsində fədakarlıq və rəşadət göstərmiş, vəzifə borcunu ləyaqətlə və vicdanla yerinə yetirmiş hərbi qulluqçu kimi bu ordenə layiq görülüb.
