Sumqayıtda sahibkar obyektdə elektrik təchizatının verilməməsindən şikayətlidir. Bu haqda 8 iyul tarixində Sumqayıt24 xəbər verir.
Məsələ Sumqayıt Avtovağzalının yanında yerləşən “Qaymaqlı store” mağazasında yaşanır. Mağazanın sahibi Rəşad Əliyev bildirir ki, avtovağzalda işıqlar iyunun 26-dan etibarən iyulun 2-nə kimi kəsilmişdi. İyulun 3-dən isə avtovağzala işıq verilib, lakin mağaza hələ də işıqsız qalıb.
Şikayətçi məsələ ilə bağlı aidiyyəti qurumlara müraciət edib. Cavab olaraq bildirilib ki, material hələ yoxdur, gözləmək lazımdır.
“1 həftəyə yaxındır işıqlar sönüb. Avtovağzalla eyni vaxtda lazımi rüsum ödədik, amma yenə də işıq verilmir. Artıq 1000 manata yaxın malıma ziyan dəyib”, – deyə R. Əliyev söyləyib.
