“Sumqayıt” basketbolçuları qələbə çalıblar. Sumqayıt24 bu haqda 6 aprel tarixində xəbər verir.
Azərbaycan Basketbol Liqasının 16-cı turunun oyunu keçirilib. Təmsilçilərimiz “Xəzri”ni 84:77 hesabı ilə məğlub edib.
“Sumqayıt”ın baş məşqçisi Teymur Hüseynovun sözlərinə görə, qələbə qazanmaq məqsədi kollektivin dadına çatıb. O, matçın son periodunda sürətlərinin azaldığını etiraf edib:
“Uşaqlar çox yaxşı döyüşdülər. Onlara bu oyunun son şans olduğunu söyləmişdim. Növbəti hədəf “Sabah”dır! Hərçənd dördüncü periodda bir qədər oyundan düşdük. Xeyli səhvə yol verdik. Amil Həmzəyevin meydana çıxması da işimizi çətinləşdirdi. Üstəlik, zədəli halda oynadı. Çox gənc kollektivik, komandanı arxasınca aparan təcrübəli basketbolçumuz yoxdur”.
Teymur Hüseynov son turlardakı uğurlu nəticələr sayəsində pley-offa iddia etdiklərini bildirib:
“Bəzi qarşılaşmalarda səhvlərimiz olmasaydı, artıq pley-offda idik. O ki qaldı sonda taym-aut götürməyimzə, düzdür, bu, rəqibin düşərgəsində narazılığa səbəb oldu. Amma mən əvvəlcədən bildirmişdim ki, top bizdə olanda taym-aut götürəcəyik. NBA-da belə hallarda taym-autdan istifadə edirlər. Hər şeyi bir kənara qoyaq, komandamız çempionatda ardıcıl 3 oyundur qalib gəlir. Biz bunu bacarmalı idik”.
Qeyd edək ki, “Sumqayıt” 22 xalla 7-ci pillədə qərarlaşıb.
