“Sumqayıt”ın legioneri Oktavio Merlo Manteka kifayət qədər zəngin karyeraya sahibdir. O, “Botafoqo” ilə Seria B-nin qalibi olub, bu komandanın heyətində Seria A-da çıxış edib, 21 yaşında “Fiorentina”ya icarəyə verilib, Belçika “Beerşot”unda oynayıb, son 4 ili isə Bolqarıstanın yüksək liqasında keçirib.
Sumqayıt24 yarımmüdafiəçinin Sportinfo.az saytına verdiyi müsahibəni diqqətinizə çatdırır:
- Azərbaycanda, Sumqayıtda özünü necə hiss edirsən?
- Hər şey yaxşıdır. Əsas odur, ailəm və oğlum yanımdadır. Ailəmlə dincəlmək üçün gəzməli yerlər, rahat restoranlar var.
- Braziliyada, İtaliyada, Belçikada yaşayandan sonra buradakı mühitə alışmaq çətinlik yaratmır ki?
- Əlbəttə, İtaliya və Belçika kimi ölkələrlə Azərbaycan arasında böyük fərq var. Ümumilikdə buranı sevirəm, bəyənirəm. Ən pis cəhət odur ki, hər kəs ingilis dilində danışmır. Bəzən anlaşmaqla bağlı çətinlik yaşayıram. Amma internetdəki tərcümə proqramları köməyimizə çatır.
- Bir neçə il əvvəl Braziliyanın yüksək dəstəsində oynayırdın, “Fiorentina”nın sıralarında idin, “Beerşot”un formasını geyinirdin, indi isə “Sumqayıt”dasan. Karyerandakı enişin səbəbini qısaca nə ilə izah edə bilərsən?
- Mənə ən böyük zərbəni ilk olaraq zədələr vurdu, sonra isə özüm. 20 yaşımda “Botafoqo” ilə Seria A-da oynayandan sonra “Fiorentina”ya 1 illik icarəyə verilmişdim. O vaxt baş məşqçi Vinçenso Montella idi. İkili söhbətdə mənə dedi ki, heyət genişdir, təcrübəli futbolçular var və biz İtaliya liqasında, eləcə də Çempionlar Liqasında qalib olmaq üçün mübarizə aparırıq. Bir müddət gözləməli idim və gözləyirdim də. Lakin günlərin birində dizimdən ağır zədə aldım və əməliyyat olundum. Beləcə 1 illik icarə sözləşməsi başa çatdı. Həmin vaxt La Liqada mübarizə aparan “Betis”dən təklif almışdım.
- Amma yenidən “Botafoqo”ya qayıtdın.
- Bəli. Çünki, ispanlar mənə 1 illik müqavilə təklif edirdi. “Botafoqo” isə başa çatan anlaşmanın müddətini 2,5 illik yeniləməkdə maraqlı idi. Çətin günlər geridə qaldı, zədəm sağaldı və çox böyük səhvə yol verdim deyə, “Botafoqo”dan ayrıldım.
- Nə etdin?
- Azarkeşlərlə dalaşdım. Bu hadisə həm özümə, həm də karyerama ciddi zərbə vurdu. Qısa müddət Braziliya klubları - “Tupi” və “Volta Redonda”da çıxış edəndən sonra Belçika “Beerşot”u ilə anlaşdım, ardınca Bolqarıstana getdim və 4 il bu ölkədə çıxış etdim.
