“Sumqayıt”ın baş məşqçisi Samir Abasov jurnalistlərin suallarını cavablandırıb. Bu haqda 2 mart tarixində Sumqayıt24 İdmanxeber.az-a istinadən məlumat verir.
“Sumqayıt” – “Kəpəz” oyunundan (1:3) sonra mütəxəssis əvvəlcə oyunla bağlı fikirlərini bölüşüb:
– Rəqibi təbrik edirəm. Oyunumuzda nə alındı, nə alınmadı, indi demək olmur. Fikirləşirəm ki, mən tərəfdən futbolçuların üzərinə getmək düzgün olmaz. Onlar da üzgündürlər, qələbə istəyirdilər. Planlaşdırmadığımız məğlubiyyətlə üzləşdik. Bu vəziyyəti xeyrimizə çevirməyə çalışacağıq. Qarşıda çətin oyunlar var. Futbolçuların üstünə getmək istəmirəm. Bəzi şeylər alınırdı, bəzi şeylər tələskənlikdən alınmırdı. Görünən o idi ki, futbolçular qələbə istəyirdilər, indi hansı vəziyyətdə olduqlarını demək çətin olar. Məndən beşqat daha pisdirlər. Qarşıdakı oyunlara köklənməyə çalışacağıq. Oyunları təxmin etmək olmur.
– Sumqayıt sakinlərini stadiona necə cəlb etmək olar?
– Bu, bizim futbolun problemidir, şəhərlərə bölməyək. Bir az sərt olacağam, bəlkə də, kimlərinsə xoşuna gəlməyəcək. Bura gələn fanatlarımızı demirəm, onlar bizə dəstək olublar. Bacardığımız qədər yaxınlarımız, dostlarımız, qardaşlarımızı dəvət etməyə çalışırıq. Fan-klubumuz yanımızda olur. Onlara gəldiklərinə görə həmişə təşəkkür edirəm. Bu gün Sumqayıtda heç bir azarkeşin ixtiyarı yoxdur ki, komandaya desin ki, niyə uduzdunuz. Gəlib dəstəkləməlidirlər və deməlidirlər ki, niyə qalib gəlmədiniz. Sən bura Hissə baxmaq üçün gəlmisənsə, gəlmə, evində bax. Belə fanatların nəyisə dilinə gətirmələri düzgün deyil. İstəyirlərsə, gəlib dəstək olsunlar, biz də onların dəstəyi ilə oynayaq. Dünənə qədər “stadion-stadion” deyənlər var idi, onlara görə vaxtı da dəyişdik ki, uyğun olsun. Gəlmirlər. İndi onların ixtiyarı yoxdur ki, komandaya gəlib nəsə desinlər. Bir sumqayıtlı kimi bunu deyirəm.
