“Sumqayıt”ın hücumçusu Kazimir Ninqa hədəflərindən danışıb. Sumqayıt24 bu haqda 27 yanvar tarixində xəbər verir.
Futbolçu bildirib ki, komanda üçün “Qəbələ” üzərində qələbə vacib idi (Premyer Liqanın 19-cu turu). Çad millisinin üzvü mövsümün ikinci yarısına “3 xal”la başlamağın önəmli olduğunu deyib:
“Qalib gəlmək üçün əlimizdən gələni etdik. Hava şəraiti əlverişli olmasa da, sonadək döyüşdük. Baş məşqçimiz Samir Abasov da bizdən bu cür əzmkarlıq gözləyirdi. Mövsümün sonunda yaxşı yerdə olmaq üçün qarşımıza hədəflər qoymuşuq”.
Azərbaycan çempionatında qol hesabını açan 30 yaşlı Kazimir bunun gələcək oyunlara müsbət təsir edəcəyini düşünür:
“Çox xoşbəxtəm ki, qələbə qolunun müəllifi oldum. Komanda yoldaşlarımın penalti epizodu zamanı verdikləri dəstək məni motivasiya etdi. Azarkeşlərimiz narahat olmasınlar, qollarımın davamı gələcək. Ən vacibi odur ki, komandaya hər oyunda fayda verim. Hələ qarşıda görəcəyim çox iş var”.
Forvard qarşıdan gələn “Araz-Naxçıvan”la qarşılaşmaya da toxunub:
“Bütün oyunlarda olduğu kimi, bu görüşdə də qalib gəlmək istəyirik. Xal qazanmaq üçün sonadək mübarizə aparırıq”.
