“Sumqayıt” futbol klubunun mətbuat xidmətindən gözlənilən transferlərlə bağlı açıqlama verilib. Sumqayıt24 bu haqda bu gün, 27 aprel tarixində Sportinfo.az-a istinadən xəbər verir.
Xidmətin rəhbəri Rəşad Məmmədovun sözlərinə görə, klub bu istiqamətdə çalışmalar aparmaq üçün mövsümün sonunu, çempionatın başa çatmasını gözləyir: “Son günlər mətbuatda bununla bağlı çoxsaylı xəbərlərə rast gəlməkdəyik. Komandanı tərk edəcək və gələcək futbolçuların siyahısı yayılıb”.
O bildirib ki, rəhbərlik hazırda gözləmə mövqeyindədir və hələlik heç kimlə danışıqlar aparılmayıb. “Nə gələcək, nə də gedəcək futbolçuların adları bilinir. Mövsüm başa çatsın, sonra bu məsələlərin hamısına aydınlıq gələcək. Rəhbərlik baş məşqçi Aleksey Baqa ilə məsləhətləşərək, lazım olan addımları atacaq”, - deyə Məmmədov əlavə edib.
