UEFA nümayəndəsi “Sumqayıt” klubuna irad bildirib. Sumqayıt24 bu haqda 31 may tarixində Report.az-a istinadən xəbər verir.
İradın mənbəyi Mehdi Hüseynzadə adına Sumqayıt şəhər stadionudur. “Kimyaçılar”ın mətbuat katibi Zaur Xudiyev bildirib ki, UEFA Konfrans Liqası oyunundan öncə stadionla bağlı hələ heç nə dəqiq deyil:
“UEFA Konfrans Liqasına II mərhələdən başlayacağıq. Düşünürük ki, ilk oyunumuzu öz stadionumuzda keçirə bilərik. UEFA nümayəndəsi arenanı yoxladı və müəyyən iradlar bildirdi. Bu, aradan qaldırılmayacaq çatışmazlıqlar deyil. Biz 4-cü kateqoriya üçün yoxlama istəmişdik. İndiki halda çox xırda, bir neçə toxunuşla avrokuboklardakı ilk oyunumuzu məhz Mehdi Hüseynzadə adına Sumqayıt şəhər stadionunda keçirə bilərik. Mətbuatda UEFA-nın “Sumqayıt”ın stadionuna qadağa qoyması barədə xəbərlər çıxıb. Bu, doğru deyil. Həmçinin 100% burada oynayacağımız da bilinmir. Lakin müəyyən düzəlişlər etdikdən sonra ilk oyunumuzu keçirə biləcəyik”.
