“Sumqayıt”ın tərcüməçisi Şahin Abdullayevin cəzalanma səbəbi müəyyənləşib. Sumqayıt24 bu haqda 1 iyun tarixində Report.az-a istinadən xəbər verir.
Futbol klubunun mətbuat katibi Zaur Xudiyev bildirib ki, AFFA İntizam Komitəsi ona topu kənara vurduğuna görə 2 oyunluq cəza verib:
“Şahin Abdullayev baş məşqçi Samir Abasovun köməkçisidir, həmçinin tərcüməçi funksiyasını yerinə yetirir. Oyunun sonunda top bizim ehtiyat oyunçular skamyasına tərəf gəldi. Şahin də qeyri-ixtiyari olaraq topu meydanın kənarına vurdu. Bu, nümayişkaranə hərəkət deyildi. Sadəcə topu kənara doğru göndərdi. Bundan sonra başda Urfan Abbasov olmaqla “Qəbələ”nin futbolçuları sərt etirazlarını bildirdilər. Baş hakim də yaxınlaşıb ona qırmızı vərəqə göstərdi. Hakim bunu protokola oyunun bərpasının ləngidilməsi kimi qeyd edib”.
Xatırladaq ki, sözügedən hadisə Premyer Liqanın 36-cı turu turunda baş verib.
