Sumqayıt şəhəri 11 nömrəli məktəbin ayrı-ayrı vəzifəli şəxslərinin qanunsuz əməlləri aşkarlanıb. Bu haqda 2 avqust tarixində Sumqayıt24 Baş Prokurorluğa istinadən məlumat verir.
Vətəndaş müraciəti əsasında aparılmış araşdırma zamanı təhsil müəssisəsində 2019-2022-ci illərdə müəllimlərin ölkədən kənarda olduqları vaxtda dərs saatları tədris etməsi və faktiki tədris edilməyən dərnək məşğələlərinin keçirilməsinə dair rəsmi sənədlərə yalan məlumatların daxil edilməsi, müvafiq laboratoriyalar mövcud olmadığı halda laborant vəzifəsinə ayrı-ayrı şəxslərin işə götürüb əməkhaqqı verilməsi yolu ilə dövlət büdcəsindən ayrılmış 27 min 860 manat vəsaitin mənimsənilməsi və israf edilməsinə əsaslı şübhələr müəyyən edilib.
Həmçinin təhsil idarəsinin ayrı-ayrı vəzifəli şəxslərinin səhlənkarlığı nəticəsində dövlət tərəfindən məktəbə verilən 103 min 130 manat dəyərində inventar avadanlıq və mal-materialların məktəbin vəzifəli şəxsləri tərəfindən yeyintisi hallarının olmasına əsaslı şübhələr müəyyən edilib.
Faktla bağlı Cinayət Məcəlləsinin “külli miqdarda mənimsəmə”, “vəzifə saxtakarlığı” və “səhlənkarlıq” maddələri ilə cinayət işi başlanaraq istintaq aparılır.
