Sumqayıtda 7 yaşlı uşağın ölümünə səbəb olmaqda ittiham olunan idman müəllimi Mehman Xəlilovun məhkəməsi başlayıb. Sumqayıt24 bu haqda 24 avqust tarixində Apa.az-a istinadən xəbər verir.
Sumqayıt Ağır Cinayətlər Məhkəməsində hakim Fəhmin Hümbətovun sədrliyi ilə hazırlıq iclası keçirilib. Burada təqsirləndirilən şəxsin anket məlumatları dəqiqləşdirilib.
İş üzrə baxış iclası sentyabrın 7-nə təyin olunub.
İttihama görə, aprelin 29-u 7 yaşlı Fərid Bakarovun Sumqayıt Şəhər Uşaq Xəstəxanasında ölməsi barədə prokurorluğa məlumat verilib. İlkin araşdırma zamanı 29 yaşlı Mehman Xəlilovun məktəblərdən birində sambo üzrə məşqdə uşağa xəsarətlər yetirməsi, sonuncunun da bu səbəbdən ölməsinə əsaslı şübhələr müəyyən edilib.
Faktla bağlı Sumqayıt Şəhər Prokurorluğunda Cinayət Məcəlləsinin 126.3-cü (qəsdən sağlamlığa ağır zərər vurma ehtiyatsızlıqdan zərərçəkmiş şəxsin ölümünə səbəb olduqda) maddəsi ilə cinayət işi başlanıb. Məşqçi şübhəli şəxs qismində tutulub.
Xatırladaq ki, Sumqayıt Şəhər Məhkəməsində Mehman Xəlilov barəsində 4 aylıq həbs qətimkan tədbiri seçilib. Təqdimata baxılarkən Mehman Xəlilov özünü təqsirli bilməyib və Fəridin ölümündə günahkar olmadığını bildirilib.
