Novxanıda arvadını öldürən biznesmen Tofiq Həsənov apellyasiya şikayəti verib. Sumqayıt24 bu haqda 28 iyul tarixində Pravda.az-a istinadən xəbər verir.
Sumqayıt Apellyasiya Məhkəməsində hakim Rəşadət Ağayevin sədrliyi ilə şikayətə baxılıb. Məhkəmə apellyasiyanı təmin etməyib.
Xatırladaq ki, hadisə ötən ilin may ayında bağ evində baş verib. Tovuz rayonundan olan və Rusiyada biznes fəaliyyəti göstərən Tofiq arvadı İlahə İsgəndərovanı 14 bıçaq zərbəsi vuraraq qətlə yetirib.
Məlumata görə, həmin hadisə İlahənin anasının gözü qarşısında baş verib. Qadın qızını xilas etməyə çalışarkən bıçaq onun əlini kəsib. Həmçinin qeyd edilir ki, İlahə İsgəndərova həyat yoldaşının aldığı bağ evinə ərini buraxmırmış. Tofiq Həsənovun iddiasına əsasən, arvadı onun Bakıda aldığı evləri və seyfdə saxladığı 200 min manata yaxın pulu da ələ keçirib.
Sumqayıt Ağır Cinayətlər Məhkəməsinin hökmü ilə biznesmen 16 il müddətinə həbs olunub.
