Sumqayıtda xuliqanlıq niyyəti ilə adam öldürən şəxsin məhkəmə istintaqı yekunlaşıb. Sumqayıt24 bu haqda 19 iyul tarixində Pravda.az-a istinadən xəbər verir.
Sumqayıt Ağır Cinayətlər Məhkəməsində hakim Hafiz Əliyevin sədrliyi ilə keçirilən prosesdə təqsirləndirilən Mahir Həsənova hökm oxunub. O, 17 il 6 ay müddətinə həbs edilib.
Qeyd edək ki, hadisə ötən il fevralın 9-da baş verib. Sumqayıt sakini, 1977-ci il təvəllüdlü Nazim Məmmədov 18-ci mikrorayonda qətlə yetirilib.
Onun tanışı, 1979-cu il təvəllüdlü Mahir Həsənov mübahisə zamanı Nazim Məmmədovu bıcaqlayaraq qəsdən öldürüb.
Mahir Həsənov saxlanılıb və barəsində Cinayət Məcəlləsinin 120.2.2-ci (xuliqanlıq niyyəti ilə adam öldürmə) maddəsi ilə ittiham irəli sürülüb.
O, məhkəmə ifadəsində deyib ki, hadisədən əvvəl Nazim Məmmədov küçədə ona tərs-tərs baxıb. Bundan narahat olduğu üçün Həsənov onunla mübahisə edib və sonda bıçaqlayıb.
