Corat bağlarında qətl törədən Müşviq Tağıyev kameraya düşüb. Sumqayıt24 bu haqda 30 oktyabr tarixində Qafqazinfo.az-a istinadən xəbər verir.
Hüquq-mühafizə orqanlarından verilən məlumata görə, onun hadisə yerinə gedərkən lentə alınması cinayəti açmaqda əhəmiyyətli rol oynayıb. Hadisə günün qaranlıq vaxtı baş verdiyindən M. Tağıyevi, demək olar ki, görən olmayıb.
Hüquq-mühafizə orqanlarının əməkdaşları yaralıların görüntülərlə tanış olmasını gözləyib. Hadisə yerinə ilk gələnlərdən və atası ilə birgə xəsarət alan sahə müvəkkili Etibar Sarıyev Tağıyevi tanıyıb. O, Müşfiqin bir qədər aralıdakı evdə yaşadığını deyib.
Bundan sonra polis Müşfiq Tağıyevi saxlayıb. Ondan cinayətdə istifadə etdiyi silah götürülüb.
İlkin araşdırmalar zamanı Tağıyev evinə basqın etdiyi Dağbəyi Fərəcovun İsveçrədə yaşayan oğlu Anar Fərəcovla ədavətinin olduğunu deyib. O, illər əvvəl Anarla arasında münaqişənin olduğunu, onun ölkəyə qayıtmasını öyrəndikdən sonra yaşadığı evə basqın edərək Anarı öldürmək istədiyini bildirib.
Lakin hadisə vaxtı Anar Fərəcov evdə olmayıb. Nəticədə qapını açan Dağbəyi Fərəcov və səsə çıxan qızı Suzana Karakaş güllələniblər. D. Fərəcovun həyat yoldaşı Tərlan Fərəcova, kürəkəni Serkan Karakaş, hadisə yerinə gələn qonşular – polis zabiti Etibar Sarıyev və atası Mehman Sarıyev isə xəsarət alıblar.
