Sumqayıtdakı silahlı insidentin bəzi təfərrüatları üzə çıxıb. Sumqayıt24 bu haqda 28 oktyabr tarixində xəbər verir.
Hadisənin münaqişə zəminində ailəyə yaxın şəxs tərəfindən törədildiyi müəyyən edilib. Hazırda onun saxlanılması istiqamətində iş aparılır.
Xəbər verdiyimiz kimi, silahlı adam Corat bağlarında evə girərək Dağbəyi Fərəcovu və onun qızı Suzana Karakaşı güllələyərək öldürüb. Suzananın həyat yoldaşı Serkan Karakaş və anası Tərlan Fərəcova da güllə yarası alıblar.
Bundan əlavə, qonşuları, sahə müvəkkili Etibar Sarıyev və atası Mehman Sarıyev də səs-küyə çıxaraq köməyə gəliblər. Bu zaman onlar da müxtəlif dərəcəli güllə xəsarətləri alıblar.
Sumqayıt Tibb Mərkəzindən bildirilib ki, xəstəxanaya gətirilənlərdən Türkiyə vətəndaşı, 38 yaşlı Serkan Karakaş əməliyyat olunub, vəziyyəti ağırdır.
63 yaşlı Tərlan Fərəcova və 65 yaşlı Mehman Sarıyev də reanimasiya şöbəsinə yerləşdiriliblər və əməliyyat olunublar. Vəziyyətləri kafi qiymətləndirilir.
33 yaşlı Etibar Sarıyev isə travmatologiya şöbəsində müalicə alır. Vəziyyəti qənaətbəxşdir.
Qeyd edək ki, Dağbəyi Fərəcov sahibkardır və kafe işlədir.
