Sumqayıtdakı marketlərin birində baş vermiş oğurluq anı təhlükəsizlik kamerasına düşüb. Bu haqda 4 oktyabr tarixində Sumqayıt24 Den.az-a istinadən məlumat verir.
Hadisə şəhərin 17-ci mikrorayonunda yerləşən marketlərin birində qeydə alınıb. Vətəndaş S. Abdülova bildirib ki, çantasını müştərilər üçün saxlanc yerinə qoyub.
Naməlum şəxs saxlanc yerinin açarla bağlı olmasına baxmayaraq, zərərçəkənin çantasını rahatlıqla çıxararaq oğurlayıb.
Zərərçəkən mövcud məsələ ilə bağlı həm market rəhbərliyinə, həm də hüquq-mühafizə orqanlarına məlumat verib.
Market rəhbəri qeyd edib ki, görüntülər polisə təqdim edilib. Hadisəni törədən şəxsin kimliyi müəyyənləşdirilir. S. Abdülovaya məxsus əl çantası marketin yaxınlığından tapılıb.
Qeyd edək ki, S. Abdülova Sumqayıtda yerləşən Laçın məktəblərinin birində müəllim işləyir.
