“New Life” reabilitasiya mərkəzinin 5 əməkdaşının məhkəmə prosesi keçirilib. Sumqayıt24 bu haqda 27 iyul tarixində Apa.az-a istinadən xəbər verir.
Bakı Ağır Cinayətlər Məhkəməsində hakim Rasim Sadıxovun sədrliyi ilə keçirilən prosesdə prokuror çıxış edib. Dövlət ittihamçısı Novxanı qəsəbəsində yerləşən mərkəzin rəhbəri Orucəli Heydərov və Elvüsal Hüseynovun 11 il, Sərxan Əliyevin 10 il 6 ay, Famil Rzayev və Qənbər Həsənovun 10 il azadlıqdan məhrum edilməsini istəyib.
İttihama görə, “New Life” narkotik, alkoqol və digər asılılıqlardan müalicə mərkəzində pasiyentlərin hər birindən 1500 manatdan 6600 manata qədər ödəniş alınıb. Reabilitasiya zamanı isə dünyada narkotik, alkoqol asılılığının müalicəsində tətbiq olunan “12 addım” proqramından istifadə olunub.
Lakin qaydalara, əmrlərə tabe olmayan şəxslərə qarşı zorakılıq edilib. Məsələn H. Məmmədov adlı pasiyent mərkəzdən qaçmaq istəyəndə əməkdaşlar onu tutaraq döyüblər. Qaçmaması üçün əl-qolunu bağlayıb, belə saxlayıblar. Bir gün sonra onun vəziyyəti pisləşib. Xəstəxanaya çatdırılsa da, kişini xilas etmək mümkün olmayıb.
Digər pasiyentlər - F. Həsənov, K. Əliyev və C. Əliyevə isə işgəncələr verilib. Onların barmaqlarının sındırıldığı və digər işgəncələrə məruz qaldıqları bildirilib.
İlkin olaraq H. Məmmədovun əzab verilməsi nəticəsində öldüyü güman edilsə də, ekspertiza rəyi bunu təkzib edib. Məlum olub ki, o, yüksək dozada narkotik qəbulundan vəfat edib.
Prokurorluq tərəfindən aparılan araşdırma nəticəsində saxlanılan beş nəfər Cinayət Məcəlləsinin 133 (əzab vermə), 145.3 (qanunsuz azadlıqdan məhrum etmə) maddələri ilə təqsirləndiriliblər.
