Sumqayıtda şəhidin həyat yoldaşını öldürən Taleh Qurbanovun cinayət işi üzrə ibtidai istintaq başa çatıb. Sumqayıt24 bu haqda 25 avqust tarixində Apa.az-a istinadən xəbər verir.
Cinayət işi materialları Sumqayıt Ağır Cinayətlər Məhkəməsinə göndərilib və hakim Hafiz Əliyevin sədrliyi ilə araşdırılacaq.
Taleh Qurbanov Cinayət Məcəlləsinin 20.1-ci (qəsdən adam öldürmə) maddəsi ilə təqsirləndirilən şəxs qismində cinayət məsuliyyətinə cəlb edilib. Onun barəsində həbs qətimkan tədbiri seçilib.
Qeyd edək ki, öldürülən Ləman Qurbanova 2022-ci ilin sentyabr ayında Ermənistanın təxribatının qarşısını alarkən şəhid olmuş kapitan Saleh Qurbanovun həyat yoldaşıdır. Ləman Qurbanovanı öldürməkdə təqsirləndirilən Taleh Qurbanov isə şəhidin qardaşıdır.
Hadisə mayın 13-də Xızı rayonunun Giləzi qəsəbəsində yerləşən fərdi yaşayış evində baş verib. Həmin gün 1999-cu il təvəllüdlü Ləman Qurbanovanın ölməsinə dair prokurorluğa məlumat verilib.
Araşdırmalarla 1984-cü il təvəllüdlü Taleh Qurbanovun onu boğaraq qəsdən öldürməsinə əsaslı şübhələr müəyyən edilib. Şübhəli qismində saxlanılan kişi hadisədən sonra könüllü olaraq istintaqa təslim olub.
