Dələduzluqda təqsirləndirilən Sadiq Qarayevin (şərti) hökmündən verilən apellyasiya şikayəti üzrə məhkəmə iclası yekunlaşıb. Sumqayıt24 bu haqda 6 sentyabr tarixində Pravda.az-a istinadən xəbər verir.
Bakı Apellyasiya Məhkəməsində hakim Emin Mehdiyevin sədrliyi ilə keçirilən prosesdə qərar elan olunub. Qərara əsasən, onun şikayəti təmin edilməyib, birinci instansiya məhkəməsinin çıxardığı hökm dəyişdirilib.
Sadiq Qarayevin 2 il müddətinə həbs cəzasl 2 il 6 aylıq azadlığın məhdudlaşdırılması (elektron qolbaq) cəzası ilə əvəz edilib. O, məhkəmə zalından azadlığa buraxılıb.
İttihama görə, Sadiq Qarayev özgənin əmlakını etibardan sui-istifadə etmə və aldatma yolu ilə ələ keçirmək istəyib. O, tanışı Əhəd Abdullayevə (şərti) özünü geniş əlaqələrə malik olan şəxs kimi təqdim edib. Sadiq həmin şəxs vasitəsilə tanıdığı Zəfər Əliyevin (şərti) qohumu, zərərçəkmiş Zəminə Əsədovanın 30.000 manat müqabilində Sumqayıtda yerləşən 37 saylı bağçaya direktor vəzifəsinə təyin edilməsinə köməklik göstərəcəyinə dair yalan vəd verib. Təqsirləndirilən şəxs onun 10.000 manatını 14 saylı notariat kontorunda 25 dekabr 2021-ci il tarixində borc müqaviləsi bağlamaqla ələ keçirib.
