Sarayda sevgilisinin keçmiş həyat yoldaşını döyməkdə təqsirləndirilən Habil Həsənova (şərti) hökm oxunub. Bu haqda 18 iyul tarixində Sumqayıt24 Pravda.az-a istinadən məlumat verir.
Məhkəmənin hökmü ilə o, qazancından dövlət nəfinə 20 faiz pul tutulmaqla 11 ay 26 gün müddətinə islah işləri cəzasına məhkum edilib.
Qeyd edək ki, hadisə Saray qəsəbəsində yerləşən "Saray" MTK-nın yeni inşa edilmiş binasının zirzəmisində qeydə alınıb.
Habil Həsənov qeyri-rəsmi ər-arvad münasibətində olan Səma Əliyevanın (şərti) evində olarkən qadının keçmiş həyat yoldaşı, zərərçəkmiş Raqif Məmmədov (şərti) gecə vaxtı qapını döyüb. Bu zaman onların arasında mübahisə yaranıb. Daha sonra həmin şəxslər liftlə binanın zirzəmisinə eniblər. Zirzəmidə Habil əli ilə Raqifin bədənin müxtəlif nahiyələrinə bir neçə dəfə zərbə endirib. Daha sonra isə üzərində olan cib bıçağı ilə Raqifin sol qulağına və sol əlinə xəsarət yetirib.
