Sumqayıtda adam öldürən İlkin Muxtarovun barəsindəki hökmdən kassasiya şikayəti verilib. Sumqayıt24 bu haqda 25 sentyabr tarixində Pravda.az-a istinadən xəbər verir.
Şikayət Ali Məhkəmənin hakimi Tahir Kazımovun sədrliyi ilə araşdırılacaq. İlkin hazırlıq iclası sentyabrın 27-nə təyin edilib.
Sumqayıt Ağır Cinayətlər Məhkəməsinin hökmü ilə İlkin Muxtarov 11 il müddətinə həbs olunub. Sumqayıt Apellyasiya Məhkəməsi şikayətini təmin etməyib.
Qeyd edək ki, hadisə ötən il iyunun 6-da baş verib. Prokurorluğa Sumqayıt sakini Vahid İmanlının xəsarətlər nəticəsində ölməsi barədə məlumat daxil olub. Faktla bağlı Cinayət Məcəlləsinin 126.3-cü (qəsdən sağlamlığa ağır zərər vurma ehtiyatsızlıqdan zərərçəkmiş şəxsin ölümünə səbəb olduqda) maddəsi ilə cinayət işi başlanılıb.
İstintaqla İlkin Muxtarovun aralarında yaranmış mübahisə zamanı Vahid İmanlıya zorakılıq tətbiq etməklə sağ gicgah-təpə nahiyəsinin yumşaq toxumalarına qansızma, alt çənənin ön səthinin sağ yarısının əzilmiş-cırılmış yarası xəsarətləri yetirməsi və sonuncunun almış xəsarətlərdən ölməsi müəyyən edilib.
İlkin Muxtarov şübhəli şəxs qismində tutularaq istintaqa cəlb edilib. Məhkəmədə İlkin Muxtarov özünü qismən təqsirli bilib. O bildirib ki, daha əvvəl 12-ci mikrorayondakı “AL market”in qarşısında evli qadınla tanış olub. Onlar bir neçə dəfə həmin marketin qarşısında görüşüb söhbət ediblər. Görüşlərin birində İlkin qadınla küçədə gəzərkən Vahid İmanlı öz dostları ilə onlara yaxınlaşıb. Bu zaman Vahid İlkinin əlindən 20 manat pul və eynəyini alıb, ona isə “var-yox” söyüşü söyərək ərazidən uzaqlaşıblar.
Daha sonra İlkin Muxtarov dostlarına hadisəni danışıb. O, Vahid və onun dostu Fuadı “Oba market”in qarşısında görərək onlar tərəfə qaçıb. Fuad ona “var-yox” söyüşü söyərək təhqir edib. İlkinin ifadəsinə görə, o, əvvəl Fuadı əli ilə vurub. Bundan sonra Vahidə yaxınlaşıb. Vahid İlkini yenidən söyərək təhqir edib. Bu zaman o, Vahidin alt çənəsinə yumruqla zərbə endirib. Zərbənin təsirindən Vahid sağ yanı üstə yerə yıxılıb və başı asfalt örtüyə dəyib.
“Onun çənəsindən qan gəldiyini görüb Vahidə yaxınlaşdım. Üzünü yudum, daha sonra ağzını açaraq dilini çölə çıxartdım. Vahidin nəfəs aldığını görüb hadisə yerindən uzaqlaşdım. Daha sonra polis əməkdaşları tərəfindən tutuldum”, - təqsirləndirilən şəxs qeyd edib.
