“İctimai Nəzarət Koalisiyası” İB-nin sədri Rasim Məmmədovun kassasiya şikayətinə baxılıb. Sumqayıt24 bu haqda 18 avqust tarixində Pravda.az-a istinadən xəbər verir.
Ali Məhkəmədə hakim Vidadi Cəfərovun sədrliyi ilə keçirilən prosesdə qərar elan olunub. Rasim Məmmədovun şikayəti təmin edilməyib, aşağı instansiya məhkəməsinin çıxardığı hökm və qərar dəyişdirilmədən qüvvədə saxlanılıb.
Sumqayıt Ağır Cinayətlər Məhkəməsinin hökmü ilə o, 2 il 6 aylıq həbs olunub. Sumqayıt Apellyasiya Məhkəməsi də onun şikayətini təmin etməyib.
Xatırladaq ki, QHT rəhbəri Rasim Məmmədov 2022-ci ilin fevral ayında həbs olunub. İttihama görə, o, 2021-ci il sentyabrın 17-də Sumqayıtda yerləşən “Azmetal” MMC-də səbəbsiz olaraq oranın direktor müavini Ramiz Hüseynovu söyüb, çölə çıxmasını tələb edib.
Ramiz Hüseynov həyətə düşdükdən sonra Məmmədov onu yenidən söyüb və mobil telefonla şirkətin anbardarı Sabir İsmayılovun başına üç dəfə zərbə vurub.
Qeyd olunan əmələ görə Rasim Məmmədova qarşı Cinayət Məcəlləsinin 221.3 (silah qismində istifadə olunan əşyalar tətbiq etməklə xuliqanlıq etmə) maddəsi ilə ittiham irəli sürülüb, barəsində həbs qətimkan tədbiri seçilib.
