Xuliqanlıq niyyəti ilə adam öldürən Mahir Həsənovun barəsindəki hökmdən verilən apellyasiya şikayəti üzrə məhkəmə başlayıb. Sumqayıt24 bu haqda 24 avqust tarixində Pravda.az-a istinadən xəbər verir.
Sumqayıt Apellyasiya Məhkəməsində hakim Elman Əhmədovun sədrliyi ilə keçirilən prosesdə təqsirləndirilən şəxsin anket məlumatları dəqiqləşdirilib.
Növbəti iclas sentyabrın 6-na təyin edilib.
Sumqayıt Ağır Cinayətlər Məhkəməsinin hökmü ilə o, 17 il 6 ay müddətinə həbs olunub.
Qeyd edək ki, hadisə ötən il fevralın 9-da Sumqayıtda baş verib. Şəhər sakini, 1977-ci il təvəllüdlü Nazim Məmmədov 18-ci mikrorayon ərazisində qətlə yetirilib. Onu tanışı, 1979-cu il təvəllüdlü Mahir Həsənov mübahisə zamanı bıçaqlayıb.
Mahir Həsənovun barəsində Cinayət Məcəlləsinin 120.2.2-ci (xuliqanlıq niyyəti ilə adam öldürmə) maddəsi ilə ittiham irəli sürülüb. O, şübhəli qismində tutularaq istintaqa cəlb edilib.
Mahir Həsənov məhkəmə ifadəsində deyib ki, Nazim Məmmədov küçədə ona tərs-tərs baxıb və o, bundan narahat olub. Bundan sonra aralarında mübahisə yaranıb və məlum hadisə ilə nəticələnib.
