Hüquqşünas 4-cü məhəllədə aparılan söküntüdən danışıb. Sumqayıt24 bu haqda 11 yanvar tarixində xəbər verir.
Hüquqşünas Ramil Süleymanov ARB televiziyasındakı "Günə son” verilişində çıxış edib. O, məhəllə sakinlərinin şikayətlərini dilə gətirib:
“Deyirlək ki, "Mahal” MTK ilə bizim danışıqlarımızı aparın. Onlara ilkin hüquqi yardımı elədim. Bildirdim ki, siz burada mülkiyyətçisiniz. Burada dövlət layihəsi icra olunmur. Sadəcə hansısa sahibkar bina tikərək, pul qazanmaq istəyir. MTK istənilən halda sizinlə razılaşmaq məcburiyyətindədir. Lakin razılaşmırlar”.
Süleymanov qeyd edib ki, şirkət vətəndaşların hüquqlarını kobud şəkildə pozur, ərazini narkoman yuvasına çevirib, bina sakinlərini də qorxutmağa çalışır:
"Təşəbbüs gözəldir. Lakin şəhər rəhbərliyi podratçı şirkəti buraxdığı zaman araşdırma aparmalıdır. Çünki "Mahal” MTK ilə bağlı sosial mediada araşdırma aparsaq, görərik ki, çox sayda şikayət var. Şirkətin təmsilçisi deyir ki, vətəndaşlar onlarla razılaşmırlar. Təbii ki, bu, vətəndaşların hüququdur. Daha sonra deyir ki, qanunsuz artırmalar var. Siz kimsiniz ki, vətəndaşın artırmasına "qanunsuz” adı qoyursunuz? Bununla bağlı İcra Hakimiyyəti sözünü deməlidir. Bundan əlavə, artırmalarla bağlı hamının əlində sənədi var. Onu da qeyd edək ki, "Mahal” MTK söküntü işini apararkən, oranı narkoman yuvasına çevirib. Eyni zamanda etiraz edən vətəndaşları da qorxudurlar”.
Sonda bildirilib ki, "Mahal” MTK "Qaraçanta” Dental klinikanın girişinin qarşısını qeyri-qanuni hörüb.
