Sumqayıt Dövlət Universitetinin (SDU) Kimya və biologiya fakültəsinin yeni dekanı Rəşad Səlimov parlaq karyerası ilə seçilir. Sumqayıt24 bu haqda 12 yanvar tarixində “Azərbaycan Universitetləri” səhifəsinə istinadən xəbər verir.
O, 2010-cu ildən Xəzər Universiteti, Bakı Mühəndislik Universiteti və Bakı Dövlət Universiteti SABAH qruplarında Biologiya müəllimliyi, 2017-ci ildən isə AMEA Botanika İnstitutunun magistraturasında Botanika ixtisası üzrə müxtəlif fənləri tədris edib.
Səlimov 2016-2019-cu illər üzrə İPBES Qlobal Qiymətləndirmə üzrə aparıcı eksperti olub. 2015-ci ildən Beynəlxalq Biologiya Olimpiadasının Azərbaycan üzrə ölkə koordinatorudur. 2016-cı ildən Dünya Florası Onlayn Konsorsiumunun Taksonomik işçi qrupunun üzvüdür.
O, Almaniyanın Berlin Azad Universiteti Berlin Botanika Bağı və Botanika Muzeyində (Freie Universıtät Berlin and BGBM) birgə elmi tədqiqatlarını davam etdirir. “Environment and Ecology Research” (Ətraf mühit və ekoloji tədqiqatlar) beynəlxalq jurnalının rəyçisidir.
Yeni dekana 2022-ci ildə Prezident İlham Əliyevin Sərəncamı ilə "Tərəqqi" medalı təqdim olunub. O, mükafata fənn olimpiadalarının keçirilməsində və şagirdlərin hazırlığı sahəsində xüsusi nailiyyətlərinə görə layiq görülüb.
