Sumqayıt Dövlət Dram Teatrında axşam tamaşası böyük maraq doğurub. Sumqayıt24 bu haqda 7 may tarixində xəbər verir.
Əməkdar incəsənət xadimi Əli Əmirlinin qələmə aldığı, teatrın baş rejissoru Xalq artisti Firudin Məhərrəmovun quruluş verdiyi "20 ildən sonra" ailə dramı nümayiş etdirilib.
Qeyd edək ki, səhnə əsərində bir aktyorun taleyi əks olunub. Geridə qalmış şöhrət, tamaşaçı alqışı, həyatın sərt üzü, sevgidə yaranan boşluq 20 illik bir ailəni dağılmaq təhlükəsi qarşısında qoyur. Gərgin və təzadlı səhnələr fonunda davam edən tamaşanın finalı hamını heyrətə salır.
Sevgi sınağını göstərən tamaşada əməkdar artistlər Xatirə Süleymanova, İlahə Səfərova, Rauf Ağakişiyev, Cəlal Məmmədov, aktyorlar Mətləb Səfərli, Kamran Murad, Məryəm Hüseynli və Etibar Əmirli rol alıblar.
Tamaşaçılar arasında ziyalılar, şəhər ədəbi ictimaiyyətinin nümayəndələri və gənclər üstünlük təşkil ediblər.
