Ceyranbatan qəsəbəsində kanalizasiya sularından iri gölməçə əmələ gəlib. Bu haqda 21 avqust tarixində Sumqayıt24 Milli.az-a istinadən məlumat verir.
Bu hal Yeni yaşayış massivində müşahidə olunur. Burada 100-lərlə ailə yaşayır. Sakinlər iddia edirlər ki, ərazidə yaranan üfunət qoxusu yaşayış evlərinə qədər çatır. İllər öncə kanalizasiya sularının çəkilib axıdılması üçün nasosxana tikilsə də, istifadəyə verilməyib. Nəticədə evlərdən çıxan çirkab boş sahəyə axıdılır.
Məsələ ilə bağlı Sumqayıt Sukanal idarəsinin baş mühəndisi Mahir İmanov bildirib ki, sözügedən yerdə kanalizasiya şəbəkəsi mövcud deyil. O qeyd edib ki, sakinlər tərəfindən onlara rəsmi müraciət daxil olarsa, gələcəkdə layihə əsasında kanalizasiya şəbəkəsi qurula bilər.
